Ik ben aine van Lammert en Annie, zee ik. Ik woon nou in Dalerveen, mien pa en moe kommn uut dizze mooie streek'n vot. Mien ma kommt van Hörsten - Oomsbaarg, dat is hier vlakbie. Mien pa komt van Valthermond. Ik vuil mie hier thuus, zee ik.
Op de hinraise zag ik d'oale mooie keuterboerderijtjes weer. Zo ston'n almoald een beetje schuun dwaars op de weg. Dat is nait zo gek, denk ik. Ik stò ook groag dwaars op de wind. Of anders bekeekn, as mie de kop nait goud staid, kin'k ook dwaars weezn. Dan mot je nait in mien buurt kommn. Maor vandoage mag je mie dwars in't haart kiekn. Zeg ik. Ik zing ain paar vèrsies, in dialect. Ik heb mien gitaar en bas mitnoam, en vertel ik joe ain verhaol uut mien bouk. Soamen mit Harma. Zij komt ook dizze kaant'n weg. Wie verstoan mekoar goud. En zo ging't precies in Smeerling. De keet zat goud vol, met goud volk. En het ging mooi. Wie heb'n lacht en wie heb'n soamen zongen.
Op de weg noar huus, op de weg van Onstwedde noar Mussel dacht ik terugge hou voak ik hier met mien pa en ma reed'n heb. Met mien bruier achterin. En hou ik hol van dizze buurt en dizze toal. In Mussel zai ik mie weer naor binn'n gaon bie Juwelier Mulder in Mussel, met mien ma. Doar kreeg ik ain kettentje met mien noam, omdat ik mien communie doan had. Mulder zit er nait meer. Dat kettentje heb ik nog. In ain gruin deussi. k kinn't nog nait weg doun.
Hail veul is hier dunk mie nait veranderd. En in mien heufd zai k hou honderd joar leedn mien grootmoe hier waark doan hed op't laand. Achter op Hörsten. Ik wol heur wel zèegn hou goud het leebn nou is. Dat 't vrouger echt nait allemoal beter was. Ik bedenk mie houvoak zij zaik was. Aaltied. En hou toun mien ma als klain wichie veur heur zörgn doan had. Ze was ain noakomeling. Heur pa en moe binn'n veuls te vroug uut de tied kommn. Most nògoan, mien ma was zo old als mien jongste dochter nou is. Vieftien.
As ik het geveul heb dat aine mie in de steek lait, dan vuil ik die pien weer. Het zit in mien blaud. Op het bidprentje wat ik nog van dizze oma heb, stait dat ze hoopte dat heur kinder noar de kèerke sölln bliemen goan, want dat was veur heur hail belangriek. Aandere tied. In mien auto zingt Gillian Welch-Orphan Girl. Doar binn ik d'r aine van.